ريت في منامي عرس بطبابيله
حفله كبيره لامه العباد
جيته زهر مانيش متعنيله
نلقاه متخلط نسي واولاد
ورجال ركبت علجياد عتيله
فراسين حب زنادهم نفاد
محفل مخلط فيه كل دويله
عرس شبحته تزيحها لنكاد
وشبحت جحفه فوق ولد كحيله
دكدوك علجبد الرسن ينقاد
تسر النظر مزينه وجميله
عليها الصبايا دايرات ارجاد
زودت لهل العرس ورجاجيله
مبروك ربي يبلغ المراد
ونشدت علمنهي عروس الليله
الله يجعله فرح بدي ينزاد
منين جاوبوا حسيت ناري شعيله
في القلب راقي لهيبها صهاد
وحسيت عقلي منه ضاع دليله
وحسيت في ضلوعي نطلق زناد
وحسيت نفسي تايهه وذليله
ووحيت كبدي علجمر وقاد
لثراه عرس ريت بحفافيله
ووقفت علسلطانته نشاد
جحفة وليف القلب فايز جيله
ومن مالكه قلبي بغير اشهاد
عيطت منهو حذاي تانشكيله
وجريت وتعثرت في الملهاد
منهو حبيبي اليوم تانحكيله
يسمع حديثي وفي البلي سداد
ياويح عقلي من البغر حليله
والقلب طاح يرق كي الجداد
لنهي علي طاقه الحليله
ولنهو علي محلق الميعاد
مسكين قالوا من الهوى يا ويله
مريض عشق بيه الله هكه راد
ولنهي دموعي علخدود هميله
ولنهو غريدي يجيب ملبعاد
منين فقت نلقى الدمع حدر سيله
دموع الميامي رنخن لوساد
والفجر علم والنجوم قليله
والروح فيها راقيه لصهاد
هالحلم ربي يحسنه تاويله
ويارب حلم ريت ما ينعاد